تم ہی بلاتے اس کو

وہ جو پاس آکے یونہی چپ سا کھڑا رہتا تھا

اُس کی تو خُو تھی یہی، تم ہی بلاتے اُس کو

(منیر نیازی)

آواز دے کے دیکھ لو شاید وہ مل ہی جائے

دیتی نہیں اماں جو زمیں آسماں تو ہے

کہنے کو تو اپنے دل میں کوئی داستاں تو ہے

یوں تو ہے رنگ زرد مگر ہونٹ لال ہیں

صحرا کی وسعتوں میں کہیں گلستاں تو ہے

اک چیل ایک ممٹی پہ بیٹھی ہے دھوپ میں

گلیاں اجڑ گئی ہیں مگر پاسباں تو ہے

آواز دے کے دیکھ لو شاید وہ مل ہی جائے

ورنہ یہ عمر بھر کا سفر رائیگاں تو ہے

مجھ سے بہت قریب ہے تو پھر بھی اے منیر

پردہ سا کوئی میرے تیرے درمیاں تو ہے

(منیر نیازی)

زندہ رہیں تو کیا ہے جو مرجائیں ہم تو کیا

زندہ رہیں تو کیا ہے جو مرجائیں ہم تو کیا

دنیا سے خامشی سے گزر جائیں ہم تو کیا

ہستی ہی اپنی کیا ہے زمانے کے سامنے

اک خواب ہیں، جہاں میں بکھر جائیں ہم تو کیا

اب کون منتظر ہے ہمارے لئے وہاں

شام آگئی ہے، لوٹ کے گھر جائیں ہم تو کیا

دل کی خلش تو ساتھ رہے گی تمام عمر

دریائے غم کے پار اتر جائیں ہم تو کیا

(منیر نیازی)

جس شہر میں بھی رہنا، اکتائے ہوئے رہنا

بے چین بہت پھرنا، گھبرائے ہوئے رہنا

اک آگ سی جذبوں کی دہکائے ہوئے رہنا

چھلکائے ہوئے چلنا خوشبو لبِ لعلیں کی

اک باغ سا ساتھ اپنے مہکائے ہوئے رہنا

اس حسن کا شیوہ ہے جب عشق نظر آئے

پردے میں چلے جانا، شرمائے ہوئے رہنا

اک شام سی کر رکھنا کاجل کے کرشمے سے

اک چاند سا آنکھوں میں چمکائے ہوئے رہنا

عادت ہی بنالی ہے تم نے تو منیر اپنی

جس شہر میں بھی رہنا، اکتائے ہوئے رہنا

(منیر نیازی)