گزرے ہیں ترے بعد بھی کچھ لوگ اِدھر سے

گزرے ہیں ترے بعد بھی کچھ لوگ اِدھر سے

لیکن تیری خوشبو نہ گئی، راہ گزر سے

(امجد اسلام امجد)

شاید کسی لکیر میں لکھا ہو میرا نام

شاید کسی لکیر میں لکھا ہو میرا نام

اے دوست اپنا ہاتھ مجھے دیکھنے تو دے

(امجد اسلام امجد)

کسی کی آنکھ جو پرنم نہیں ہے

کسی کی آنکھ جو پرنم نہیں ہے

نہ سمجھو یہ کہ اس کو غم نہیں ہے

سوادِ درد میں تنہا کھڑا ہوں

پلٹ جاؤں مگر موسم نہیں ہے

سمجھ میں کچھ نہیں آتا کسی کو

اگرچہ گفتگو مبہم نہیں ہے

سلگتا کیوں نہیں تاریک جنگل

طلب کی لو اگر مدھم نہیں ہے

یہ بستی ہے ستم پروردگاں کی

یہاں کوئی کسی سے کم نہیں ہے

کنارا دوسرا دریا کا جیسے

وہ ساتھی ہے مگر محرم نہیں ہے

دلوں کی روشنی بجھنے نہ دینا

وجودِ تیرگی محکم نہیں ہے

میں تم کو چاہ کر پچھتا رہا ہوں

کوئی اس زخم کا مرہم نہیں ہے

جو کوئی سن سکے امجد تو دنیا

بجز اک بازگشتِ غم نہیں ہے

(امجد اسلام امجد)